Skilaboð frá eldhúsinu -Veitingahúsið TALISMAN-

Það er svo merkilegt að Suðureyri er vistvænsta sjávarþorp á Íslandi, það er okkar sérstaða. Íbúar á Suðureyri eru mjög stoltir af því að búa og starfa við framleiðslu á hágæða vistvænum sjávarafurðum sem sendar eru daglega ferskar beint inn í verslanir um víða veröld. Á veitingahúsinu Talisman hefur lengi verið lögð alúð í að bjóða gestum með stolti þessar fyrsta flokks framleiðsluafurðir Íbúana, því við erum öll fiskimenn í sjávarþorpinu Suðureyri. Það er okkar menning sem við viljum bjóða þér að upplifa.

Hönnun

Í hönnun á innviðum veitingahússins má meðal annars nefna að matarstell var handunnið í þorpinu af leirkerasmiðnum Ólöfu Oddsóttur, þorsklampar eru verk Daggar Guðmundsdóttur, málverk af norðurljósum eru verk Jóns Sveinssonar og matseðlar eru innbundnir í hlýraroð.

Nafnið TALISMAN

Nafnið TALISMAN kemur frá skipinu Talisman EA sem fórst rétt fyrir utan Suðureyri 24. mars 1922. Sjóslys hafa í gegnum aldirnar verið tíð við Íslandsstrendur en saga þeirra 4 manna af 16 sem komust lífs af í slysinu á alltaf eftir að vera stórmerkileg hetjusaga um þrekraunir sjómanna. Eftir langan óveðursbarning á hafi úti strandaði skipið og brotnaði á strandstað svo skipbrotsmönnum skolaði í land.  Þeir sem lifðu strandið af skriðu í óveðri, yfir snjó og klakalagt fjörugrjótið út fjörð og inn til Flateyrar.  

Frá 1. maí til 15. sept opnar veitingahúsið kl: 08:00 með morgunverðarhlaðborði, síðan eru léttar veitingar allan daginn fram til kl: 18:00 en þá er opið fyrir neðangreindan matseðil vel fram eftir kvöldi.